1991 թվականի այս օրը «Համաձա՞յն եք, որպեսզի հռչակված Լեռնային Ղարաբաղի Հանրապետությունը լինի անկախ պետություն» հարցին «այո» պատասխան տվեց ավելի քան 108 հազար, իսկ դեմ քվեարկեց 24 մարդ: Ռազմական գործողությունները դեռ ընթանում էին, սակայն Արցախի հզոր ու քաջ բնակչությունը կարողացավ իր ձայնն արտահայտել:
Տարիներ շարունակ արցախցին ապրել ու շենացրել է Արցախը՝ գրեթե միշտ վտանգի սպասելով:
Այսօր կրկին ծանր ու դժվար օրեր են, շատերը հարազատներ են կորցրել, շատերը՝ հայրենի տները:
Հավերժ փա՛ռք նահատակվածներին,
Ուժ ու կորով արցախահայությանը,
Շուտափույթ ապաքինում վիրավորներին:
Մեր վիրավոր հայրենիքը դեռ կբուժվի վերքերից, մենք՝ երկրապահներս, ինչպես 90-ականներին, այդպես էլ հիմա նույն ոգով, նույն վճռականությամբ Արցախի ու Հայաստանի հանրապետությունների սահմաններում ենք:
Հարգելի՛ հայրենակիցներ,
Դուք 2006 թ. նույն այս օրը կրկին համաժողովրդական հանրաքվեի արդյունքում ընդունեցիք Արցախի Սահմանադրությունը: Դուք հերոս ժողովուրդ եք:
Մենք երկրապահներս հպարտանում ենք Արցախի ու Հայաստանի մեր սերունդով, մեր հզոր բանակով: Այսօր մեծ ցավ կա բոլորիս սրտերում, բայց վստահ ենք, որ մենք համատեղ դեռ կկառուցենք արցախցու երազանքների հայրենիքը՝ անկախ ու ազատ Արցախի Հանրապետությունը:
«Մենք այնքան էլ սովորական ազգ չենք։ Եկեք այս ծանր երկունքով ծնված պետությունը համարենք մեր բոլորի ծնունդը, մեր բոլորի գուրգուրանքի առարկան։ Սխալներին նայենք ոչ թե թշնամաքով, այլ եղբայրական հանդուրժողականությամբ: Կարելի է նաեւ ապտակել, բայց եղբոր ապտակով, այլ ոչ թե թշնամու սրով…»,- Վազգեն Սարգսյան:
Սպարապետի պատգամին, թողած ժառանգությանը հավատարիմ մնալով մենք միշտ պայքարելու ենք, եւ շենացնելու ենք Հայաստանի եւ Արցախի հանրապետությունները:
ՀՀ ԵԿՄ վարչություն
